I'm a bad Muslim

السلام عليكم ورحمة الله

هذا البوست كان عبارة عن تعليق في مدونة الأصالة لأخوي ولد الديرة .. لكن لان حجمه كبير (مثل ما انتو عارفين ما اعرف اختصر اذا اشتطيت ) حطيته في بوست

يقول ولد الديرة في بوسته : " تذكرت سؤال صديق بريطاني منذ وقت طويل حين سألني "هل دينكم يحض على العنف""

حين قرأت هذه الجزئية تذكرت موقف صادفني عندما كنت أدرس في أمريكا في أحد تجمعات النساء العربيات كانت هناك امرأة مصرية الجنسية لم انتبه للجزئية الاولى من الحديث ولكن لاحظت هجوم بعض النساء لها بالأسئلة ووجهات النظر تقول : " سألوني الأمريكيات كيف لك ان تشربي الخمر وانتي مسلمة؟ فأجبتهم I'm a bad muslim " فكانت نصيحتها للنساء الغير مباشرة لا تعطين الأمريكيات اجابات خاطئة عن الاسلام وتحاولن بهذا تحسين صورتكم الحقيقية ولا تنشرن افكارا عن الاسلام والاسلام منها بريء.

رغم استياء البعض من صراحتها و(تحلطم) البعض الآخر لا سيما الخليجيات .. لانهم صبوا اهتمامهم على الجزئية الأولى ونسوا مغزى القصة .. إلا انها أعجبتني كثيرا بهذا الموقف ولا اتصور انني سأنساه في يوم من الأيام
لكن ..
هل يستطيع الجميع فعل هذا؟؟
هل يستطيع ان يقول Im a bad muslim لأني قتلت ناس أبرياء مالهم ذنب سوى التواجد بالمكان الخاطيء في الوقت الخاطيء لحاجة في نفسي وليس للاسلام دخل بها
او يقول
Im a bad muslim لأني اقف خلف ستار الاسلام لتحقيق مكاسبي الدنيوية من مادة وسلطة والتي ليس للاسلام علاقة بها
او يقول
Im a bad muslim لأني احرض الشباب اليافعين على الانتحار واغسل ادمغتهم لأحولهم إلى ناقلة بشرية لمتفجراتي
هادما بهذا طموحهم
وأماني آبائهم
ودعاء أمهاتهم ؟
وأمل وطنهم
وعزة دينهم

كم شخص اضطر لقطع دراسته أو قطع رزقه مجبرا على العودة لوطنه بسبب هذا؟
كم شخص دفع ثمن شيء لا ذنب له فيه ؟؟

والكثير الكثير من الأمثلة

لكن السؤال هو

هل يجرؤ أحدهم على قول

Im a bad muslim

لان الاسلام عندي ستريج

اشده وارخيه متى ما اشاء

إلى متى تطيلون الغياب؟؟

السلام عليكم ورحمة الله

في خاطري كلمة ..

لمن أطالوا الغياب .. ولم اجد لهم مواضيع جديدة في مدوناتهم منذ فترة طويلة

ولا قصورا باخواني واخواتي من الموجودين

ولكنني افتقد اسماء كثيرة .. اشتقت لمعرفة اخبارها ومشاطرة افكارها والنقاش معها

كيف لا .. وقد ضحكت .. بكيت .. تألمت .. شفيت .. حزنت .. فرحت .. طمحت .. احبطت .. فشلت .. حاولت .. نجحت .. وفضفضت .. مع تلك المدونات

لا أمتلك سوى ان أقول اشتقت لكم

The Thinker

أبو لطيف

kuwait

fskra

ManalQ8

فارس هوى الكويت

أنا كويتي

GawGa3a

كويتاوي

فتى الجبل

sky is falling

بودي

Solaiman

صلاح الأنصاري

قلب طفلة

U turn

اهو وزوجته

Mishari

ضاد

وتطول القائمة .. اسمحولي ان نسيت احد

ولكن المناشدة كانت لكل من غاب بغض النظر عن ذكري لاسمه او لا

وبامكانكم مساعدتي بذكر من غاب عنكم

نعلم ان الظروف تجبرنا احيانا لكن طمنونا عليكم فقط

.

.

.

من جانب آخر (خلصت الرومانسية الحين)

.

.

افتح يا سمسم

.

.

اللي مقفلين مدوناتهم فتحوهم احسن لكم

لا تضطروني افتن والبوست الياي تصير لسته ثانية عنوانها " فجوا الباب"

.

.

.

أشوفكم على خير

اكتتاب بنك وربة

السلام عليكم ورحمة الله وبركاته

أدري وايد منكم الموضوع مار عليه

.

واحتمال يقول قديم

.

بس انا وحدة من الناس ما كنت أدري عن هالسالفه

.

توني اليوم دريت عنها

.

واهي اكتتاب في بنك وربة

.

الاكتتاب مجاني مدفوعه تكاليفة من قبل الحكومة الكويتية

.

فاللي ما اكتتب يدخل على هذا الرابط ويكتتب

.

اكتتاب بنك وربة

.

.

.

أشوفكم على خير

.

.

.

عشاق شماخر .. مع التحية

السلام عليكم ورحمة الله وبركاته

شلونكم جميعا

إلى عشاق شماخر والسويقه

ما دعاني لكتابة هذا الموضوع أو بالأحرى هذه الرسالة هو ما اراه في شوارعنا من تهور وقلة احترام البعض ناسين ان قيادة السيارة بحد ذاتها ماهي إلا صورة من صور حضارة وثقافة ورقي الشعوب

وانتو لا خليتوا فيها لا حضارة ولا ثقافة ولا رقي .. امبلا رقي يمكن بفتح الراء وتشديد القاف

- اللي طاير على الحارة اليمين والحارة اللي بالنص .. واللي طاير فوق الـ 140 على الحارة اللي على اليسار ومشتغل تترك للي جدامه .. ومسكين الثاني مو قادر يفتح له لان في سيايير على اليمين .. لا وتطلع بنت بعد وتتدوده وتنام على اللي يمها ويعطيها ذاك البريك اللي شوي ويدش فيه اللي وراه كل هاللويه عشان واحد مو قادر يتأخر شوي على الغدا

- اللي فجأة لف بدون لا يطق اشارة حق اللي وراه .. واللي شايف ناس يايه على الدوار وطالع ما همه ولا فكر اصلا يخفف حق الدوار .. نظام انا ومن بعدي الطوفان

تدرون تهاونا وعدم اهتمامنا بالموضوع هذا ادى إلى شنو ؟؟ ادى إلى ان حتى المقيمين (ماراح اقول البعض هالمرة بقول الاغلبية) صاروا ما يحترمون احد بالشارع وحتى القوانين المرورية تخالف بل وصلت فيهم حتى انهم يعصبون ويأشرون لك تعبير عن استيائهم .. تخيلوا عاد هندي ويتحلطم شيفكنا ( مع احترامي لكل الشعوب)

اللي ادهى من ذلك وامر هو رمي المخلفات
يعني في تخلف اكثر من هالتخلف ؟؟ عيزان تحط لك جيس داخل السيارة تقط فيه مخلفاتك ؟؟ وتقولون ليش ماكو خضرة .. وينكم وين الخضرة وانتو مغطينها

اي صح بالمناسبة : راعي المرسيدس الابيض اللي بمشرف امس .. حذفت الزقارة وقلنا ميخالف .. بس عاد اييني الباكيت طاير ماله داعي كلش .. انا بس تخيلت الوضع لو يكون في بانزين او اي ماده سريعة الاشتعال بالشارع والاخ حذف زقارته شنو ممكن يصير.

اصحاب الامثلة اللي فوق :
الموضوع كله باختصار .. عامل الناس مثل ما تحب انهم يعاملونك واحترم نفسك تفرض احترامك على الناس .. وشوي شوي ترى الدنيا ماراح تطير .. تبي توصل متأخر ولا ما توصل خير شر؟؟؟؟
وسالفة التحذف من الدريشه يوزوا عنها فشلتونا

القيادة فن وذوق

.

.

.

.

أشوفكم على خير

عدت يا أيها الشقي

السلام عليكم

وشلونكم وشخباركم جميعا

انا صار معاي شي غريب

حطيت راسي ونمت امس الساعة تسع ونص .. وقعدت بعدها بجم ساعه على صوت يهمس باذني

كل عام وانتي بخير بابا

فتحت عيني إلا ريلي عند راسي .. بكل استغراب سألته .. ليش؟؟

جان يقولي هابي بيرث دي دخلنا 2/10

@@

انصدمت .. المفروض انها مفاجأة حلوة

بس انا انصدمت من نفسي اني مو حاسه بالوقت ولا واعية احنا باي يوم ولا باي تاريخ مع اني كلش مو من النوع اللي ممكن انسى يوم ميلادي

في احد مثلي صار senseless من ناحية الوقت ؟؟

هل لأني باجازة مثلا؟؟ هل لاني استانست عالقعده بالكويت وما ودي ارجع اسافر؟؟

طيب الطلبة اللي يدرسون برة .. لما ترجعون الكويت باجازة يحوشكم هالاحساس ؟؟

.....

همسة : اخوي المدون صلاح الأنصاري .. كل عام وانت بالف خير وكل عام وانت من الله أقرب .. يوم ميلاده يصادف يوم ميلادي وتوقعت انه كاتب نفس العنوان مثل العام بس غاط صارله جم شهر .. يا رب المانع خير

...

همسة اخرى : اخوي المدون أحمد الحيدر شرايك بس بالعوده الحين ؟؟ هههه

عدنا والعود احمد .. مبارك عليكم باجي الشهر

السلام عليكم ورحمة الله وبركاته

مبارك عليكم الشهر وكل عام وانتو بألف خير يا رب

شوفوا لحد يزف ولحد يتشره قلبي رجيج ما يتحمل

ولهت عليكم كلكم بدون استثناء

وألف شكر لكل من مر يسأل عني

ولا يتشره علي .. على بالي والله لكن لظروف قصوى اضطريت اختفي

وها نحن عدنا ننشد الهولو على ظهر السفينة

تقبل الله طاعتكم وكل عام وانتو بخير

أشوفكم على خير

كويت + ولد الديرة

ألف شكر لكم

عيدكم مبارك

من هنا

ومن الكويت الحبيبة

اقول لكم كل عام وانتو بالف خير

وعيدكم مبارك

سامحوني لقلة حضوري ومتابعتي .. وراح ارجع الاقيكم بعد الاجازة باذن الله

أشوفكم على خير

.

.

.

همسة

11 - 11

كل عام وانت

أطيب وأحن قلب

عدت يا أيها الشقي

قاعدة في بيت أهلي

في بجامه العيد لول

مع أمي مجابلين التلفزيون

فجأة دخلوا اخواني ووراهم ريلي شايل كيكة

يغنون هابي بيرث دي :)

إحساس يونس ويبجي ويضحك ويفشل

أكثر شي حلو بالموضوع

ان الشمعة كانت على علامة استفهام لووول

على قولتهم شعليج كيكتج من Guess

الجماعة طلعوا عصابة

هني مخططين

وهني مخططين

بمساعدة امي اللي كل ما ييت اقوم فتحت موضوع

عشان اشتط واسولف فيه لووول

طلعت اختي بعد شاريه كيكه

تبون الصج عاد؟

ما توقعت أحد يذكر مع لوية العيد

عسى الله لا يحرمني منهم يا رب

أشوفكم على خير :)

عيدكم مبارك .. وأيامكم سعيدة يا رب

السلام عليكم ورحمة الله

ما مداني أعايد عليكم اليوم سامحوني

تقبل الله طاعتكم وعسى الله يعوده عليكم بالصحة والعافية والمغفرة يا رب

عيدكم مبارك وكل عام وانتو بألف خير

يالله كل واحد يقولي شنو سوى اليوم ؟؟ وشلون احتفاليات العيد معاه

أشوفكم على خير يا رب

كل عام وأنتو بألف خير

السلام عليكم ورحمة الله

مبارك عليكم الشهر

وكل عام وانتم بخير

وكل عام وأنتم من الله أقرب

إجازة تدوينية وراجعة باذن الله

أشوفكم على خير

* ملاحظة: لازلت بإجازة تدوينية بس راح اكون متواجدة بتعليقاتي باذن الله

إهمال

السلام عليكم ورحمة الله

أتمنى انكم تكونون بخير جميعا

قاعدة أقلب بالقنوات قبل شوي جان أثبت على قناة الوطن ولا حاطين إعادة حق برنامج تو الليل

مستضيفين فيه بطلة كويتية في لعبة الكيوكوشنكاي اسمها دعاء حسين

استغربت اني اول مرة اسمع فيها أو اشوفها .. واستغربت ان هذا اول ظهور لها واهي اللي مثلت الكويت في الكثير من البطولات العالمية .. وحسب ما فهمت انها كادت أن تكون بطلة العالم في هاللعبة

بطلة مثل هذي ليش تسافر على حسابها الخاص عشان تمثل ديرتها في محافل وبطولات؟؟

مع العلم انها قالت " ان طلبوها دولة خليجية ان تمثلها في بطولة العالم واهي رفضت " لأنها ما رضت تمثل غير الكويت

انقهرت وقعدت افكر

عندنا هالطاقات .. وعندنا طموحات ما يشيلها راس .. وعندنا " إمكانيات " رهيبة .. لي متى بنتم جذيه؟

والسؤال اللي يتكرر في كل موضوع وعلى جميع الأصعدة .. خيرنا ليش يروح حق غيرنا؟؟

....

قبل فترة تكلمني وحدة من البنات بطلة رماية .. بنادي الصيف والفروسية وحصلت على مراكز أولى بأكثر من بطولة

تقولي تصدقين .. في مشرفات يسافرون معانا بس جذيه تطمش ووناسة واهم مالهم باللعبة لا ناقة ولا جمل

والمشرفات اللي بنادي الصيد والفروسية أساسا ما يفهمون باللعبة ولا يدرون عن هوى دارها .. وزين اصلا اذا كانو يعرفون أسامي الرماة اللي عندنا بالنادي .. والبعض ماسكين اشراف حق المكافأة اللي تنزل لهم لا أكثر ولا أقل.

...

نادي الفتاة بعد مثال جيد حق الاهمال الواضح ..
اهتمام بلعبة واهمال بلعبة ثانية
طبعا على ايامي كان الوضع جذيه ما ادري شلون الحين
بس من كلام البنات ان لازال الوضع على ماهو عليه

شوفو الاهتمام بالالعاب انتو بس
كنت العب تيكواندو فترة من الفترات بنادي الفتاة
طلع المدرب من النادي وتمينا بدون مدرب
تتوقعون شنو ردهم ؟؟
قالت لنا المشرفة : حولوا حق كاراتيه
@@
يا سلااااام؟؟؟
ما أقول إلا الله يذكرك بالخير يا د.وليد سراب
والله يذكر أيام الأكاديمية بالخير

.......

وبالنسبة حق نادي المعاقين الرياضي .. رحت له قبل فترة عشان استبيان يملونه اخوانا ذوي الاعاقة قبلها سولفت مع مسؤول العلاقات العامة .. أشر لي على صبي صغير قالي هذا سباحنا " يمكن عمره ما يتعدى ثمان سنين" بطل سباحة .. مشينا شوي .. صادفنا بنوته على ويل جير عرفني عليها وسلمت عليها بعد ما مشت قالي هذي بطلة باللعبة الفلانية.. واشرلي على واحد بعيد قال هذا بطل اللعبة ذيك .. سألته قلت له الحين هالصالة كل شي يلعبون فيها؟؟
استغربت ان الصالة قاعد يلعبون فيها سلة مجموعة .. ومجموعة ثانية يتدربون على الشيش ومجموعة ثالثه بالكورنر يتدربون على لعبة والله حتى نسيت اسمها شنو.. ثلاث اربع العاب تدريب بنفس الصالة وين صارت .. وانا من دقايق مريت على اربع خمس ابطال مو ابطال الكويت ابطال خليج وابطال دوليين بعد .. هذي وين صارت يا جماعة؟؟
اخوي كويت انجنير بعد ما قصر بهالموضوع بس كان لابد من الاشارة إلى أكثر من جانب له

...

اللاعب عندنا ياخذ غيابات بدوامه ولا ينفصل من جامعته وحب خشوم عشان يرد ولا يمشي حاله عشان شنو؟؟ عشان راح يمثل الكويت بلعبة معينة هذي وين صارت يا جماعة؟؟؟
إلا اللهم الجامعات الخاصة بالكويت .. بصراحة هذول اشيلهم من القائمة لان دعمهم المعنوي بهالجانب وتشجيعهم للاعب الطالب عندهم لابد ينذكر لهم أمثال الجامعة الأمريكية والكلية الاسترالية

...
ومع كل هذا .. لازال عندنا مواهب ولازال عندنا أبطال نفتخر فيهم .. ولا راح يحط من عزيمتهم شي كل هالاهمال وعدم الالتفات لهم .. لأن هدفهم رفع علم الكويت مع أعلام باجي الدول بالمحافل والبطولات.
لي متى هالإهمال؟؟؟ والله قهر

.

.

.

أشوفكم على خير

همسات

.

براك ..

.

الحين اقدر اقول من صج مبروك

أخيرا وصلتني نسخة ..

راح أرجع أكتب بوست بقراءتي

بس اخلص منه باذن الله

.

.

.

.

.

.

كل الشكر زوزو لا خلا ولا عدم ان شاء الله

.

.

.

.

.

.

.

الشــعـــب

.

مدونة جديدة تنطلق بقوة

لن أعرّفها أفضل من تعريف صاحبها لها

فقط تابعوا ذلك القلم

لأنه بالفعل يستحق المتابعة

.

.

.

.

هدى حسين : كل عام وانتِ بخير

.

.

.

أشوفكم على خير

غصبن على الآلام

وطني

وطــ النهار ـــن

انت النهار .. يا وطني

أنت الأمل لي هل

وانت النهار لي طل

آه يا وطن

ياللي انولدت من جديد

انت محيط الأرض

يا موج البحار

وطن النهار

وياك عبرت الزمن

الله اشكثر يا كويت

قلبي خفق يا كويت

شلتك بيوفي وطن

أنت الوطن بس انت

أنت الأصل بس انت

انت الحياة .. بس انت

غصبن على الآلام

ترجع وطن من جديد

آه يا وطن

ياللي انولدت من جديد

انت محيط الأرض

يا موج البحار

وطـــــــــــ النهارــــــــــن

كـلمات : بدر بو رسلي

ألحان : سليمان المـــلا

الخطوط الجوية الكويتية .. " يا عيب الشوم "

السلام عليكم ورحمة الله

ياني يوم الخميس اتصال اضطريت ارجع بسببه الكويت

اقرب طيارة كانت الكويتية

رحلة الساعة سبع

طبعا كالعادة الخطوط الكويتية تخترب سمعتها اذا ما تأخرت

يصير فيها شي اذا ما تأخرت

الحجوزات فل على طيران الخليج

وانا ما احب الكويتية آخر مرة طرت عليها سنة 96

من زمان اسمع عن تأخيراتها وعدم التزامها بالمواعيد

بس قلت لازم ارد ان شاء الله لو على بعير

لبست وطلعت حق المطار

وصلت المطار الساعه خمس ونص

على ما سويت البوردنق

ورحت على بوابتي

طليت في البوردق ولا مكتوب 6:10 الدخول

طليت بالساعه جان اقول يالله ما بقى الا شوي خل اقعد شوي اقرا على ما تصير وعشر

صارت وعشر جان اسأل اللي عالبوابة

اخوي مو المفروض الحين ندش الطيارة؟

جان يقولي اي بي عليها تاخير

قلت له يعني متى ان شاء الله ؟

جان يقولي بعد ربع ساعه

قلت له على خير ورديت مكاني

صارت الربع ساعة

قلت يا بنية لا تحنين

كا ان شاء الله دقايق ويقولون لنا دخلوا

الربع ساعه يرت وراها ربع ساعه ثانيه

صارت الساعه سبع

صارت سبع ونص

قلت لا هذا الشي ما ينسكت عليه

جان اروح له قلت له اخوي لي متى بننطر المفروض سبع تكون طايره

جان يقولي والله اختي شوي بس

قلت له اخوي حولني على القولف اير انا ما اقدر انطر

كلها جم ساعه وبارجع البحرين مرة ثانية

ما ادري شنو طقطق بالجهاز جان يقولي والله القولف اير للأسف فل

قلت لا حول ولا قوة إلا بالله

والعمل الحين شلون يعني جان يقولي بس عشر دقايق

قلت انا شحقه حاكرة عمري

خل اطق فره وارجع لهم

شلت قشي ورحت قعدت بكوستا

طليت بالساعه ولا الساعه ثمان ونص

قلت خل اروح اشوف ولو انهم ما اعلنو بس خل اطل

يوم اطل ولا ماكو ولا احد من اللي ناطرين معاي واقف ليلحين

قلت وي لايكون طارت لوووووول

يوم اسأل جان يقولون لي ودوها القيت الفلاني

رحت القيت الثاني

ولا هم نفس الشي واقفين

بعد ثلث ساعه دخلونا وركبنا الباص

وانا بالباص ولا بنيه يمي شكلها كانت متملله مثلي الفقيرة

جان اقول لها شوفي شوفي جم طيارة حق القولف اير واقفه

تدرون تبارك الله جم طيارة واقفه

هذول اللي بالمطار بس

واللي مريت انا عليهم بس تقريبا اكثر من 15 طيارة

تبارك الله

اللهم لا حسد .. بس غبطة صراحة

ركبنا الطيارة

ولا نتنقع ثلث ساعه بعد

تدرون الساعه جم طارت يا جماعه ؟؟

طارت الساعه تسع

يعني هالاربع ساعات ونص مرت من عمري بكل اسف على نطرة طيارة

اللي يضحك بالموضوع ان وحده قاعدة على يساري كانت تتحلطم بعد

قالت لي عاد انا يوم الثلاثه اللي طاف كنت طايرة على الكويتية

تخيلي ان طرنا نص ساعه وردونا

قلت لها ليش؟

جان تقول وحدة من المراوح اختربت

انا بققت عيني @@

جان تقولي اي والله كتبوا عنها بالجريدة بعد

....

واخزياه يا الكويتية

.

.

.

بكل صراحة

.

.

.

يا عيب الشوم

.

.

.

أشوفكم على خير

سابقين الكل كنا

ما عندي شي اليوم

..

.

بس

.

..

في خاطري كلمة

.

..

.

براك .. وديوانه الأول

السلام عليكم ورحمة الله

ان شاء الله الجميع بخير

أثلج صدري خبر صدور ديوان اخونا بـــراك الأول. عساه فاتحة خير يا رب ومزيدا من الدواوين ان شاء الله .

ياليته يكون موجود بفيرجن القسم اللي عندنا. لأني حسب ما عرفت انه موجود بمحلات فيرجن بالمرينا والمطار بالكويت.

لحين ما أحصل الديوان سأعود على التعليق.

اقروا له .. لأنه يستحق القراءة.

كل التوفيج يا براك

هيئة الزراعة والثروة السمكية .. برافو

السلام عليكم جميعا

ان شاء الله تكونون كلكم بخير

طبعا رديت من البحرين قبل جم يوم بالسيارة وانا صارلي يمكن ثلاث سنين ما سافرت بالسيارة .. لكن تبارك الرحمن الخط كان سهالة ( اللي يسمعها يقول اهي اللي قاعد تسوق ) .. وصلنا الحدود عالخمس ونص تقريبا الفير وعلى الرغم ان كان غبار لكن من دخلنا الكويت تبارك الله ياني احساس غريب لا تسألوني شنو لاني ماراح اعرف أوصفه .. اللي شد انتباهي وصج صج صج اثلج صدري أن الكويت صارت خضرة تبارك الله .. ما ادري من زمان ولا توه يعني بما ان صارلي اكثر من خمس شهور بره الديره وما رحت فيهم الشاليه لكن حيل فرق علي .. بس تعدينا جليعه صرت اشم ريحه الزرع واهما يقصونه يا جماعه والله احساس مو طبيعي .. انا طقتني البوهه من الأماكن اللي صارت خضرا وقاعد يقصون الثيل فيها ما شاء الله تقول زل مفروش تبارك الله .. ولي جنوب السرة وريحة الحشيش اللي جازينه ( صح جازينه ؟؟) ما فارقتني .. صورت لكن الصور مو واضحة وريلي النحيس استلمني طنازة ولا رضى يوقف عشان اصور لول .

كل اللي ابي اقوله .. من كل قلبي يا هيئة الزراعة والثروة السمكية .. بـــــرافـــو عليكم تثلجون الصدر والله

عساها دوم خضرا يا رب مثل قلوب أهلها

همسة على كتر : ترى نجحت وبتفوق بعد .. عقبال الصيفي .. مدونتي تستقبل التهاني والتبريكات والدعوات للكورسات اليايه :)

لي وين بتوصلونا بعد ؟؟

السلام عليكم ورحمة الله

في البداية اعذروني جميعا على غيابي اللي كان سببه امتحانات الفاينل .. ادعوا وياي تطلع النتايج أفضل من المتوقع

ثانية أحب أقول قبل لا أبتدي هالبوست ان فكرة البوست مستوحاة من اخوي انجنير من

بوسته الأخير

فكرت اضيف له رد تالي لقيت ان الرد بحد ذاته يبيله مدونة

-لجنة الظواهر السلبية-

بصراحة انا توني ادري ان في لجنة اسمها لجنة الظواهر السلبية أنا أتوقع إن أولى الظواهر السلبية اللي تستدعي اهتمام المسؤولين إهي هذي اللجنة لو كان صج في لجنة بهالاسم عندنا وبما ان ما عندي خلفية عنها فلا اخمبق وايد واسكت هني أبرك لول

- البلاي ستيشن -

فيما ذكره اخوي المهندس عن رقابتهم على اشرطة البلاي ستيشن وأفلام الكارتون .. انا ماني ضد الرقابة لكن ما تستدعي الأمور المواضيع التافهه ومثل ما قال انجنير كلنا كنا يهال وشفنا سواءا كارتون ولا بمسرحيات الستينات ولا الافلام العربية ولا الأجنبية أشوف ما انحرفنا لكن تدرون ليش اهما خايفين على هالجيل؟؟ مو عشان انه عصر الانفتاح وعصر الانترنت والفضائيات لا .. لان عصر الـ لا لا لا

الياهل من صغره يعلمونه لا عيب .. ما يصير .. حرام .. هذا عيب وذاك عيب .. وهذا وذاك ما يجوز

أنا ما قلت فتحوها بحري لـ عيالكم لكن ربوهم مثل ما ربونا أهلنا ولا تقولون ذاك الزمن كان غير .. انا ما قلت ان هالزمن نفس ذاك الزمن .. بس انا اتوقع ان الزمن تغير والسبة كلمة هالوقت يخرع

من كثر ما آمنا بهالكلمة أصبحت كابوس تلحقنا بكل مكان وبكل مجال وبكل موضوع

كنا .. نقول الله خير حافظ

وصرنا .. نقول الوقت متسبب

كنا .. نلعب بالفريج مع عاشر يار

وصرنا .. ما نعرف عيال ييرانا منو

كنا .. نلعب صبيان وبنات

وصرنا .. عيب نلعب مع الصبيان

كنا .. لا طاحت الياهل واهي لابسه تنوره تنتفض من فشلتها لا يشوفونها اللي حواليها

وصرنا .. لا طاحت الياهل تنتفض من خرعتها لا يشوفها ابوها ويهاوشها

كنا .. واحنا يهال نسأل عن كل المواضيع واجودها يكون رده .. لا كبرتي تعرفين

صرنا .. اشوف اليهال لهم مجال محدود من الأسئلة مع أهلهم .. فيسألون ربعهم عشان لا يحصلون زفه

كنا .. نسوي مثل ما يسوي أهلنا لأن عندنا ثقه ان صح

وصرنا .. نسوي اللي يقولون لنا عنه أهلنا عشان لا ننزف .. واحتمال ما نسويه بغيابهم

وكنا وكنا وكنا

وصرنا وصرنا وصرنا

وايد أمور .. بس باختصرها .. الياهل مو محتاج تعقيد حق الأمور ولا محتاج كثر الـ لاءات

لان كثرتها راح تولد عنده احساس بالفضول

- الـلواط و الـمسترجلات-

وماني قايلة سوري على الكلمة لأن بصراحة ومن وجهة نظري الشخصية أشوف ان من اكبر الأغلاط ان نطلق عليهم تسمية الجنس الثالث والبويات واهما وايد اتفه من ان نطلق عليهم مسميات يديده

ملاحظة على كتر : خل يستريحون ربع جمعية حقوق الانسان

الله خلقنا جنسين ذكر وانثى لما نناديهم بالأسماء اللي اهما اساسا مختارينها معناته ان احنا راضين بوجودهم .. فالنقطة الأولى التسمية ماله داعي نجمل المفردات ومثل ما سماهم دينا احنا بعد بنسميهم

حطوا قوانين ضدهم ما يمنع .. بس مو كل من خلقه ربي آدمي وقال لا آنا ابي اصير خروف ولا شاذي رحنا وسويناله فئة بروحه وقلنا عنه فئة المتشبهين بالخرفان وهذي ظاهره لازم نحاربها

لان مثل هذي الظواهر ما تستحق تعطيها حجم من الاساس

فلي هني والملف هذا بالنسبة لي بيقفل

- لجنة الأمر بالمعروف والنهي عن المنكر-

طول عمرنا ومن صغرنا واحنا على الأمر بالمعروف والنهي عن المنكر منا وفينا لا احتجنا خيازرين ولا احتجنا اوادم تلحق فينا .. لاني ما اتخيل بصراحة راح اسكت عن واحد مبحلق ومو غاض البصر على بو يأمر بالمعروف .. اتوقع خيزرانته بتتكسر على ظهره حزتها .. جانها دين ولا حجارة

* ملاحظة على كتر : لغير الناطقين بالكويتية الفصحى .. حجارة يعني غارية

.......

أدري طولت عليكم

أشوفكم على خير

مثواك الجنة يا يبه

السلام عليكم ورحمة الله




وعظم الله أجوركم جميعا .. وعظم الله أجرج يا الكويت





" إنا لله وإنا إليه راجعون ، اللهم آجرنا في مصيبتنا واخلف لنا خيرا منها "





اليوم فقدنا شخص عزيز علينا كلنا .. ما ينفع اتكلم عن بطولاته وعن شجاعته وحبه حق الكويت وأهلها





لان البوست وايد اصغر من ان يتحمل كل الكلام بهالخصوص ومهما تكلمنا ماراح نوفيه حقه





الفاجعة هذي أثرت فيني حيل .. وعارفة ومتأكدة انها اثرت فيكم كلكم مو بس الكويتيين الخليجيين والعرب.





اسمحولي اخليكم تشاركوني قصة طموحي ..





كان عمري ست سنين .. يوم قام بتشريفه لقاعدة علي السالم الجوية بمناسبة تخص أحد الأسراب





كنت متلهفة أشوفه من قريب مثلي مثل كل الأطفال اللي بسني .. وأكيد مثلي مثل الكبار بعد





بين الضباط والحماية وقفت ماسكة الورد انطر حضوره .. وصبري كان صبر أطفال





وصل بابا سعد .. وتقدمت بكل فرحة أقدم له الورد .. سلمت عليه .. وبكل تواضع وبنبرة الأب الحنون





سألني عن أسمي وجاوبته .. جان يقول :





" إن شاء الله تكبرين يا بنيتي .. وتصيرين دكتورة "





رددت الجملة يومها أكثر من عشرين مرة حق كل من سألني شنو قال لج .. من الضباط .. من الأهل .. من المدرسات بالمدرسة وربعي بالصف.





الجملة كانت تروح وترد على بالي بهالسنين .. ولأني كنت طفلة فهمت ان الدكتوراه حق الأطبه بس .. بس بعد ما كبرت شوي فهمت اني ممكن اكون دكتورة بدون لا أكون طبيبة .. بدا الحلم يكبر معاي كل ما كبرت وظلت الكلمة معاي بكل طموح أحققه .. بس من بعد ما تخرجت من جامعة الكويت وييت البحرين أكمل الدراسات العليا واهي ترن باذني بدون مبالغة كل يوم وأحيانا باليوم أكثر من مرة





" ان شاء الله تكبرين يا بنيتي وتصيرين دكتورة"





هذا اللي كنت أصبر نفسي فيه وانا بعيدة عن أهلي .. بعيدة عن زوجي الحبيب .. بعيدة عن بيتي .. ولا قصور بالبحرين وأهلها.





" ان شاء الله تكبرين يا بنيتي وتصيرين دكتورة "





هذي الجملة اللي كنت ناوية فيها أبتدي مناقشة رسالاتي .. وعشان لا أنسى حطيت الصورة بكل مكان عندي





" ان شاء الله تكبرين يا بنيتي وتصيرين دكتورة "





ولو بأتكلم عن بابا سعد ومدى تأثري فيه .. من أكبر شي سواه حق الكويت والكويتيين .. لي أصغر شي بالنسبة لغيري والأكبر عندي وهو تكليفي مسؤولية هالطموح والدافع .. راح أبخسه حقه بالتأكيد .. لأن جد الحرف عاجز والكلام ما يوفي





ياليت اللي يمر عالبوست .. حتى لو يطوف مقدمته .. لا يطوف أو ينسى الدعاء لبابا سعد الله يرحمه





هذا أكثر شي أهو محتاجه مني ومنك ومنها .. ادعوا معاي بارك الله فيكم :





اللهم يا رحمن يا رحيم .. يا عفو يا غفور .. يا أرحم الراحمين





"اللهم إن بابا سعد في ذمتك وحبل جوارك ، فقه من فتنة القبر وعذاب النار





وأنت أهل الوفاء والحق ، اللهم اغفر له وارحمه إنك انت الغفور الرحيم"





" اللهم اغفر له وارحمه، وعافه، واعف عنه، واكرم نزله، ووسع مدخله، واغسله بالماء والثلج والبرد،





ونقه من الخطايا كما ينقى الثوب الأبيض من الدنس، وأبدله دارا خيرا من داره وأهلا خيرا من





أهله، وزوجا خيرا من زوجه، وأدخله الجنه ، وأعذه من عذاب القبر وعذاب النار "





"اللهم عبدك وابن امتك احتاج إلى رحمتك ، وانت غني عن عذابه





إن كان محسنا فزد في حسناته وان كان مسيئا فتجاوز عنه "





" اللهم إنك عفو كريم تحب العفو فاعفو عنه يا أرحم الراحمين "





" اللهم ارحم امواتنا واموات المسلمين يا رب العالمين "